Nga Katedralja e Athinës, me një ceremoni të ngjeshur dhe nën tingujt solemnë të bandës së marinës detare greke, kortezhi që përcillte trupin e Kryepeshkopit të Shqipërisë, Anastas Janullatos, është nisur drejt vendit tonë. Qindra besimtarë ndoqën ceremoninë e meshës në gjuhën shqipe, një kërkesë e bërë nga bashkëpunëtorët e afërt të Kryepeshkopit dhe e miratuar nga Shinodi i Shenjtë Grek, për të nderuar fortlumturinë e tij.

Arkivoli i Kryepeshkopit u përcoll me duarrokitje të shumta nga të pranishmit, të cilët nderuan punën dhe veprën e tij të jashtëzakonshme për paqen dhe vëllazërimin. Ky akt i nderimi u mbështet dhe nga presidentja e Greqisë, Katerina Sakellaropoulou, e cila e quajti Anastas Janullatos një njeri të madh të paqes dhe bashkëpunimit ndërmjet dy popujve.

Trupi i Kryepeshkopit Anastas do të mbërrijë në Shqipëri ditën e nesërme përmes pikës kufitare të Kakavijës, ku do të vijojnë ceremonitë e nderimit dhe kujtimit.