Nga sot, 1 Janar 2025, ka hyrë në fuqi vendimi për lëvizje të lirë pa viza për qytetarët e Bosnjë-Hercegovinës në territorin e Kosovës.

Në minutat e para pas mesnate, një grup qytetarësh nga Bosnjë-Hercegovina kanë hyrë në Kosovë pa pasur nevojën për viza, duke shënuar një moment historik për lirinë e lëvizjes ndërmjet dy vendeve.

Grupi i parë i vizitorëve u prit në pikëkalimin kufitar nga zëvendëskryeministrja e Kosovës, Emilia Rexhepi, e cila i përshëndeti dhe vlerësoi këtë hap si një moment të rëndësishëm për afrimin dhe bashkëpunimin mes dy vendeve.

Vendimi për heqjen e vizave u njoftua fillimisht nga kryeministri Albin Kurti gjatë Samitit të Procesit të Berlinit në tetor të vitit të kaluar. Ky hap është konsideruar si një gjest i rëndësishëm politik dhe ekonomik, i cili pritet të forcojë marrëdhëniet mes Kosovës dhe Bosnjë-Hercegovinës.

Të gjithë qytetarët nga Bosnjë-Hercegovina që mbajnë karta identiteti tashmë mund të udhëtojnë lirshëm në Kosovë, duke lehtësuar komunikimin, tregtinë dhe shkëmbimin kulturor mes dy vendeve.