TIRANË – Kryetari i Komisionit Qëndror të Zgjedhjeve, Ilirian Celibashi, ka certifikuar zyrtarisht rezultatin e zgjedhjeve të 11 majit në Qarkun Kukës, i pari nga qarqet që ka përfunduar procesin e numërimit, përfshirë edhe votat e diasporës dhe ato preferenciale.

Sipas deklaratës së Celibashit gjatë mbledhjes së KQZ-së, fituese në Kukës është shpallur Partia Demokratike – Koalicioni për Shqipërinë Madhështore.

Megjithatë, opozita që doli fituese në këtë qark, ka ngritur pretendime për manipulim të votave dhe ka kërkuar nisjen e një auditimi të plotë të procesit zgjedhor që nga data e dekretimit të zgjedhjeve, për të evidentuar të metat dhe parregullsitë e mundshme.

Kreu i KQZ-së theksoi se shqetësimet dhe vërejtjet ndaj procesit zgjedhor do të diskutohen në mbledhjet e ardhshme, duke mos dhënë detaje të mëtejshme për hapat që do të ndiqen.

Ndërkohë, pas Kukësit, është përmbyllur numërimi i votave edhe në qarqet Dibër dhe Shkodër, ndërsa procesi vijon në qarqet e tjera të vendit.

Situata mbetet në vëmendje të medias dhe palëve politike, ndërsa mbeten ende për t’u certifikuar rezultatet në disa qarqe kyçe të vendit.