Komisioneri Shtetëror i Zgjedhjeve, Ilirjan Celibashi ka deklaruar se nëse një parti politike do të kërkojë hapjen e kutive të votimit, KQZ do t’i hapë dhe do të bëjë një vlerësim të fletëve të votimit.

Në një komunikim me gazetarët, Celibashi paralajmëroi se do të ketë sanksione të rënda për përgjegjësit, nëse nxjerrin rezultate të kundërta nga ato që janë konfirmuar nga komisionerët.

“Në lidhje me sigurinë e procesit do të sjell disa gjëra në vëmendje të publikut, për të konfirmuar që çfarë KQZ ka bërë, janë të tilla që sigurojnë procesin zgjedhor dhe vullnetin e votuesve. Jam i sigurt që procesi, veçanërisht ai i nxjerrjes së rezultatit, nuk do të ketë probleme. Komisionerë, të cilët do të angazhohen në këtë proces, janë të ndërgjegjësuar për të gjitha penalitetet që do të kenë, nëse sjellja e tyre do të jetë në kundërshtim me detyrën që ka. KQZ nuk do të tolerojë në asnjë mënyrë dhe për asnjë rast asnjë komisioner, që do të vërë në provë forcën e ligjit për çdolloj arsye.

“Me dispozitat e reja të kodit zgjedhor, tani është sanksionuar e drejta e cdo subjekti që qoftë edhe pa asnjë arsye të kërkoje hapjen e kutive të votimit dhe të bëhet këqyrja e fletëve të votimit për të parë nëse ato fletë që do të këqyren dhe votat që do dalin  janë në përputhje me rezultatin që kanë konfirmuar komisionarët apo jo. Nëse do të rezultojë e kundërta ata që do të jenë përgjegjës kanë penalitete nga 1-7 vite burg.

Do ta theksoj këtë për ti hequr çdo kujt atë “interesin” apo dhe dëshirën që gjatë procesit të nxjerrjes së rezultatit të demonstrojnë në tabelën e rezultateve një rezultat të ndryshëm nga ai të cilin gjejnë në kutinë e votimit.

Pas procesit zgjedhor kushdo që do të kërkojë hapjen e kutive të votimit, KQZ do të hapë kutitë dhe do të bëjë një rivlerësim atyre fletëve të votimit.

Nëse dikush dje ka menduar se mjafton të nxjerrim rezultatin, kutitë do mbyllen dhe nuk do merret njeri me këtë punë. Jo do merremi me këtë punë”, tha Celibashi.