Tiranë – Komisioneri Shtetëror i Zgjedhjeve, nën drejtimin e Ilirjan Celibashit, ka zhvilluar sot mbledhjen ku janë plotësuar vakancat e krijuara në pesë këshilla bashkiakë dhe janë shqyrtuar rezultatet e verifikimit për disa kandidatë vetëdeklarues.
Vakancat janë plotësuar në Këshillat Bashkiakë të Tiranës, Dibrës, Vorës, Belshit dhe Rrogozhinës. Kandidatët e rinj që do të zënë vendet bosh janë:
• Fatjon Bathorja – nga koalicioni “Bashkë Fitojmë”
• Aida Murrja – nga Partia Socialiste
• Lavdurije Shahini – nga Fryma e Re Demokratike
• Avni Shtylla – nga Partia Socialiste
• Dhurata Meka – nga Partia Republikane Shqiptare
Verifikimet e kandidatëve vetëdeklarues
Në mbledhje u shqyrtua gjithashtu rezultati i verifikimit të Prokurorit të Përgjithshëm për subjektin vetëdeklarues Euglen Gjini, kandidat për deputet i propozuar nga koalicioni “Nisma Shqipëria Bëhet – Adriatik Lapaj” në Qarkun Fier, për zgjedhjet parlamentare të datës 11 maj 2025.
Komisioneri vendosi përfundimin e procedurës administrative pa marrë vendim përfundimtar, pasi vlerësohet se “ka humbur objekti dhe qëllimi i procedurës”, e cila ishte nisur përpara ditës së zgjedhjeve.
I njëjti vendim u mor edhe për subjektin vetëdeklarues Ilir Mollaj, kandidat për anëtar në Këshillin e Bashkisë Mirditë, i propozuar nga Partia Lëvizja e Legalitetit, për zgjedhjet vendore të datës 14 maj 2023.
KQZ konfirmoi se procedurat për të dy kandidatët janë mbyllur pa pasoja ligjore, duke theksuar se vendimet janë marrë në përputhje me afatet ligjore.
