Komisioni Qendror i Zgjedhjeve ka rrëzuar kërkesën e Partisë Demokratike për hapjen e 43 kutive të votimit në qarkun e Vlorës, si pjesë e një hetimi administrativ lidhur me dyshimet për manipulim të fletëve të votimit në zgjedhjet e 11 majit.

Megjithatë, me kërkesë të dy anëtarëve të KQZ-së, u vendos që katër kuti votimi të hapen dhe të këqyren, për qëllime verifikimi teknik. Këto kuti i përkasin katër bashkive të qarkut të Vlorës: Vlorë, Selenicë, Sarandë dhe Finiq.

Verifikimi për fletët e papërdorura

Qëllimi i hapjes së këtyre kutive nuk është rinumërimi i votave, por verifikimi i numrit të fletëve të papërdorura, pasi sipas të dhënave në sistem, në këto kuti është deklaruar se nuk ka pasur asnjë fletë votimi të papërdorur – një gjë që ka ngritur dyshime.

Akuzat e PD: Mungojnë mbi 130 mijë fletë votimi

Partia Demokratike pretendon se gjatë procesit zgjedhor të 11 majit ka pasur shkelje të rënda në administrimin dhe raportimin e fletëve të votimit. Sipas PD, mbi 130 mijë fletë votimi të papërdorura rezultojnë të zhdukura, duke ngritur dyshime për një manipulim të mundshëm të rezultatit.

Sipas opozitës, diferenca mes fletëve të prodhuara dhe atyre të raportuara si të votuara, të papërdorura apo të dëmtuara nuk përputhet, dhe kjo cenon besueshmërinë e procesit zgjedhor në disa qarqe, përfshirë Vlorën.

KQZ: Hetimi vijon, por në mënyrë të kufizuar

Komisioni Qendror i Zgjedhjeve është shprehur se është i hapur për hetime administrative kur ka elementë të arsyeshëm dyshimi, por vendosi që hapja e 43 kutive kërkuar nga PD nuk përbën aktualisht nevojë ligjore apo procedurale.

Pavarësisht kësaj, për të garantuar transparencë dhe për të verifikuar integritetin e sistemit të raportimit, KQZ miratoi kontrollin fizik të katër kutive, nga të cilat priten sinjale orientuese nëse do të nevojiten hetime më të gjera në ditët në vijim.

Reagimi i PD

Burime nga selia blu bëjnë të ditur se Partia Demokratike nuk do të tërhiqet nga kërkesa për zbardhjen e plotë të situatës me fletët e votimit dhe se do të ndjekë rrugë të tjera ligjore për të detyruar një hetim më të thelluar.

Në ditët në vijim pritet që PD të paraqesë ankesa pranë Komisionit të Ankimimeve dhe Sanksioneve, ndërkohë që hapja e katër kutive pritet të realizohet në prani të vëzhguesve dhe përfaqësuesve të partive politike.

Situata vjen në një kohë tensioni politik të shtuar pas zgjedhjeve të fundit, ku opozita ka ngritur një sërë akuzash për parregullsi të thella në disa qarqe kyçe të vendit.