Brian Thompson, kreu i kompanisë amerikane të sigurimeve “UnitedHealthcare”, është qëlluar për vdekje me armë zjarri në New York. Ngjarja ka ndodhur të mërkurën jashtë hotelit “Hilton” në Manhattan, ku Thompson pritej të mbante një fjalim në një konferencë investitorësh.

Thompson, 50 vjeç, u dërgua menjëherë në spital pas sulmit, por fatkeqësisht ka ndërruar jetë. Policia ka raportuar se autori i dyshuar ishte maskuar dhe e kishte pritur jashtë hotelit, duke e shënjestruar si viktimë të sulmit.

“UnitedHealthcare” është kompania më e madhe private e sigurimeve në Shtetet e Bashkuara të Amerikës. Autori i dyshuar ka arritur të largohet nga vendi i ngjarjes dhe hetimet për gjetjen e tij po vazhdojnë.