Lideri i Lëvizjes “Shqipëria Bëhet” ka reaguar ashpër ndaj deklaratës së Ministrit të Brendshëm, Ervin Hoxha, lidhur me ngjarjen e rëndë të punonjësit të policisë A.S, i cili dyshohet se është vënë nën presion psikologjik para se të hidhej nga një pallat.

Në deklaratën e tij, kreu i Lëvizjes “Shqipëria Bëhet” e ka cilësuar përgjigjen e ministrit si të papërshtatshme dhe të padenjë për një përfaqësues të shtetit.

“Lexoni Ministrin e Brendshëm në reagimin e tij për ngjarjen e policit që ka dyshime të arsyeshme se është vendosur nën presion psikologjik, me pasojë rrezikimin e jetës së tij, dhe kupton pse ky shtet është në gjendjen që është.“

Ai e ka sfiduar ministrin duke kërkuar një përgjigje konkrete për ngjarjen, ndërsa ka theksuar diferencën mes arrogancës dhe një pune të ndershme në institucionet shtetërore.

“Z. Ervin, rrugaç bëhesh kur të duash, njeri me kulturë dhe zyrtar i mirë të duhet sakrificë e punë.
Z. Ministër, përgjigju çfarë ndodhi me punonjësin e policisë A.S?“

Ndërkohë, Lëvizja “Shqipëria Bëhet” ka njoftuar një protestë më 20 janar, ora 17:00, në Sheshin Skënderbej, ku qytetarët do të marshojnë drejt Ministrisë së Brendshme për të kërkuar drejtësi dhe transparencë mbi këtë çështje.