Një ngjarje e rëndë familjare ka tronditur qytetin e Durrësit, ku një i ri vrau babain e tij me thikë dhe u largua nga vendngjarja. Viktima është identifikuar si Pjetër Kodheli, 69 vjeç, ndërsa autori i dyshuar është Marjan Kodheli, 25 vjeç.

Sipas njoftimit zyrtar të policisë, pas një ndjekjeje intensive prej dy orësh, shërbimet e Forcës së Posaçme “Shqiponja” arritën ta lokalizonin dhe ta arrestonin 25-vjeçarin në zonën e plazhit të Durrësit.

Gjatë kontrollit, policia i gjeti dhe i sekuestroi një thikë, e dyshuar si arma e krimit. Burime policore bëjnë me dije se i riu dyshohet të ketë probleme të shëndetit mendor.

Ngjarja ka ndodhur në banesën e familjes, ndërsa motivet e konfliktit që çuan në tragjedi nuk dihen ende.

Materialet hetimore i janë referuar Prokurorisë së Durrësit për veprime të mëtejshme, ndërsa hetimet vazhdojnë për të zbardhur plotësisht rrethanat e krimit makabër.