Një krim i rëndë në familje ka ndodhur mëngjesin e sotëm në Konispol të Sarandës, ku një çift i moshuar është vrarë në kushte tragjike. Sipas raportimeve nga policia, ngjarja ka ndodhur rreth orës 07:00 në fshatin Shalës.

Burri, Hysen Islamaj, 69 vjeç, ka goditur bashkëshorten e tij, Shano Islamaj, 66 vjeçe, me një sëpatë, duke i marrë jetën në banesë. Pas kësaj, konflikti ka vazhduar me djalin e çiftit, Klementin Islamaj, 40 vjeç, i cili, në një përplasje, ka shtyrë babanë nga shkallët e banesës. Si pasojë e dëmtimeve, Hysen Islamaj ka ndërruar jetë në vendngjarje.

Policia ka arrestuar Klementin Islamaj dhe ka nisur hetimet për sqarimin e rrethanave të ngjarjes. Sipas njoftimit të policisë, ka filluar procedura për verifikimin e motiveve dhe për të përcaktuar natyrën e veprës penale, nëse do të klasifikohet si vrasje me dashje apo aksidentale.

“Rreth orës 07:00, në fshatin Shalës, Konispol, dyshohet se gjatë një konflikti për motive të dobëta, në banesë, shtetasi H. I., 69 vjeç, ka vrarë me mjet prerës (dyshohet sëpatë) bashkëshorten e tij, shtetasen Sh. I., 66 vjeçe. Më pas, shtetasi H. I. dyshohet se është konfliktuar me djalin e tij, shtetasin K. I., rreth 40 vjeç, i cili e ka shtyrë shtetasin H. I. nga shkallët e banesës. Si pasojë e dëmtimeve, shtetasi H. I. ka humbur jetën në vendngjarje,” njoftoi policia zyrtarisht.

Prokuroria vendore është angazhuar në hetimet për këtë ngjarje dhe është duke mbledhur prova dhe dëshmi për të përfunduar procesin hetimor. Çifti i të moshuarve kishte tre fëmijë, dy djem dhe një vajzë.

Klement Islamaj është i ndodhur në polici, ku po jep sqarime për ngjarjen. Policia dhe Prokuroria po vazhdojnë hetimet për të përcaktuar të vërtetën e plotë të ngjarjes dhe për të përcaktuar akuzat përkatëse.