Për herë të parë, Zyra e Kryeministrit britanik ka pranuar publikisht se situata e gomoneve që transportojnë ilegalisht emigrantë nga Franca drejt brigjeve të Britanisë së Madhe po përkeqësohet ndjeshëm.

Deklarata u bë pas takimit bilateral mes kryeministrit britanik Sir Keir Starmer dhe presidentit francez Emmanuel Macron, zhvilluar në kuadër të samitit të G7 në Kanada. Dy liderët theksuan nevojën për të intensifikuar bashkëpunimin dhe për të gjetur “rrugë inovative” në luftën kundër trafikimit të qenieve njerëzore, si dhe për ndalimin e kalimeve të rrezikshme përmes Kanalit të La Manshit.

Megjithë një sërë investimesh të mëdha britanike – përfshirë 480 milionë paund të paguara Francës për të forcuar sigurinë bregdetare – numri i emigrantëve që kalojnë në mënyrë të paligjshme vijon të rritet. Të dhënat zyrtare flasin për mbi 16 mijë emigrantë të mbërritur në Britani që nga fillimi i vitit, një rritje prej 42% krahasuar me të njëjtën periudhë të vitit të kaluar.

Sipas autoriteteve franceze, veprimet parandaluese ndaj gomoneve në zonat kufitare detare janë të kufizuara për shkak të ligjeve ndërkombëtare të detit, të cilat nuk lejojnë ndërhyrje direkte në situata që mund të rrezikojnë jetën e emigrantëve në bord. Për këtë arsye, forcat franceze shpesh kufizohen në vëzhgim dhe dokumentim, pa ndërhyrje të drejtpërdrejtë.

Në një tjetër takim gjatë samitit, Starmer diskutoi edhe me kryeministren italiane Giorgia Meloni, duke theksuar rolin që sipas tij Britania duhet të ketë si udhëheqëse në luftën globale kundër trafikimit të njerëzve.

Pavarësisht retorikës diplomatike dhe fondeve të investuara, mbetet e qartë se kriza në Kanalin e La Manshit po arrin përmasa alarmante, ndërsa zgjidhja efektive për frenimin e këtij fenomeni ende nuk është në horizont.