Ushtria izraelite ka vazhduar bombardimet intensive në Qytetin e Gazës më 13 gusht, ndërsa po përgatitet për një ofensivë të planifikuar për marrjen nën kontroll të plotë të kësaj zone. Ministria e Shëndetësisë në Gaza raportoi se në 24 orët e fundit kanë humbur jetën 123 persona, shifra më e lartë e regjistruar brenda një jave që nga nisja e konfliktit.

Lufta midis Izraelit dhe Hamasit, grupit palestinez të shpallur organizatë terroriste nga SHBA dhe Bashkimi Evropian, tashmë po hyn në vitin e dytë. Kryeministri izraelit, Benjamin Netanyahu, përsëriti idenë se palestinezët duhet të largohen nga Gaza, duke theksuar se ata “do t’u lejohet të ikin” dhe se vendet e tjera duhet të hapin dyert për strehimin e tyre.

Ky plan përballet me kundërshtim të fortë ndërkombëtar dhe shqetësime se një zhvendosje e tillë do të përbënte një “nakba të dytë” për palestinezët, duke rikthyer kujtimet e katastrofës së vitit 1948. Rimarrja e Qytetit të Gazës nga Izraeli, e cila ishte nën kontroll në ditët e para të luftës, pritet të ndodhë pas disa javësh, sipas zyrtarëve, megjithëse bisedimet për armëpushim kanë ngecur.

Banorët raportojnë se aeroplanët dhe tanket izraelite sulmuan zona të ndryshme gjatë natës, duke shkatërruar shtëpi dhe duke shkaktuar viktima. Në lagjen Zeitun, 12 persona u vranë pasi shtëpia e tyre u godit nga bombardimet, ndërsa në Han Junis tetë persona që po prisnin ndihma u vranë nga sulmet, sipas mjekëve palestinezë.

Gjithashtu, tetë persona të tjerë, përfshirë tre fëmijë, kanë humbur jetën nga uria dhe kequshqyerja brenda 24 orëve të fundit. Sipas Ministrisë së Shëndetësisë në Gaza, që nga nisja e luftës më 7 tetor 2023, mbi 235 persona kanë vdekur nga uria dhe kequshqyerja, përfshirë 106 fëmijë.

Konflikti nisi pasi Hamasi sulmoi jugun e Izraelit, duke vrarë afërsisht 1.200 persona dhe rrëmbyer 251 të tjerë. Deri tani, ofensiva izraelite ka shkaktuar mbi 61.000 viktima palestineze, sipas të dhënave të Ministrisë së Shëndetësisë në Gaza, të cilat konsiderohen të besueshme nga OKB-ja.