Presidenca e Madagaskarit ka njoftuar të dielën se po përballet me një tentativë për grusht shteti, pasi disa ushtarë janë bashkuar me protestuesit që prej 25 shtatorit po kërkojnë dorëheqjen e presidentit Andry Rajoelina.

Në deklaratën zyrtare, presidenca thekson se “disa individë po përpiqen të marrin pushtetin në mënyrë të paligjshme dhe me forcë”, duke paralajmëruar se autoritetet do të ndërmarrin masa për të ruajtur rendin kushtetues.

Sipas agjencisë Reuters, një pjesë e njësisë speciale CAPSAT, e cila dikur mbështeti Rajoelinën për të marrë pushtetin në vitin 2009, tani është rreshtuar kundër tij, duke i bërë thirrje trupave të tjera të mos zbatojnë urdhrat presidencialë dhe të bashkohen me lëvizjen popullore.

Protestat, të cilat nisën fillimisht për mungesën e ujit dhe energjisë elektrike, janë shndërruar në një lëvizje të gjerë antiqeveritare, e frymëzuar nga protestat e “Gjeneratës Z” në Kenia dhe Nepal.

Tashmë, kërkesat e protestuesve janë bërë politike: dorëheqja e Rajoelinës dhe falje publike për dhunën ndaj demonstruesve.

Situata në kryeqytetin Antananarivo mbetet e tensionuar, ndërsa burime vendase raportojnë për praninë e shtuar të forcave të armatosura dhe bllokime të shumta rrugësh përreth institucioneve shtetërore.