Kroatët kanë dalë për të votuar këtë të diel në balotazhin presidencial, mes presidentit aktual Zoran Milanoviç dhe Dragan Primorac, kandidati i Bashkimit Demokratik të Kroacisë, partisë në pushtet. Qendrat e votimit u hapën në orën 07:00 dhe do të qëndrojnë të hapura deri në orën 19:00. Rezultatet paraprake pritet të bëhen të ditura pas mbylljes së votimit, ndërsa rezultatet zyrtare shpallen në ditët në vijim.

Rreth 3.8 milionë kroatë kanë të drejtë të votojnë në këtë raund të dytë. Në raundin e parë, dy javë më parë, Milanoviç udhëhoqi me 49.1% të mbështetjes, ndërsa Primorac mori vetëm 19.35%. Një sondazh i publikuar ditën e premte tregon se Milanoviç, i cili përfaqëson Partinë Social Demokrate, kryeson me 67.4% të mbështetjes ndaj Primorac, ish-ministër i shkencës, që ka më pak se 27%.

Edhe pse kreu i shtetit kroat nuk ka fuqinë të vërë veton ndaj ligjeve, ai ka një rol të rëndësishëm në politikën e jashtme, mbrojtjen dhe sigurinë. Gjatë mandatit të tij, Milanoviç është përplasur me kryeministrin Andrej Plenkoviç për politikat e jashtme dhe publike, dhe ka kritikuar ashpër mbështetjen e Bashkimit Evropian dhe NATO-s për Ukrainën.

Pavarësisht retorikës së tij populiste, Milanoviç shihet nga shumë si kundërpesha e vetme ndaj qeverisë konservatore, e cila ka pasur tërheqje të ministrave për shkak të akuzave për korrupsion.