Kryebashkiaku i Tiranës, Erion Veliaj, ndodhet prej dy orësh në Prokurorinë e Posaçme (SPAK), ku po pyetet lidhur me disa dosje nën hetim. Mësohet se Veliaj po jep llogari për hetimin pasuror që po zhvillohet ndaj tij dhe familjarëve të tij, si dhe për disa qarkullime financiare të dyshimta nga Bashkia e Tiranës në drejtim të familjarëve të tij.

Veliaj është i përfshirë në disa hetime të ndërlidhura, duke përfshirë aferën e inceneratorëve të Tiranës, dosjen “5D”, shembjen e Teatrit Kombëtar, ndërtimin e kullave në kryeqytet, shembjen e objekteve në “5 Maji” dhe rindërtimin e banesave të dëmtuara nga tërmeti i vitit 2019. Kjo është hera e dytë që kryebashkiaku i Tiranës pyetet nga SPAK, pasi më 30 prill ai dha dëshminë e tij për aferën e inceneratorëve.

Përveç Veliajt, disa ditë më parë u mor në pyetje edhe bashkëshortja e tij, Ajola Xoxa, në lidhje me hetimet që po kryhen.