Kryeministri i Bavarisë, Markus Söder, ka kërkuar negociata të menjëhershme me talebanët për organizimin e fluturimeve të dëbimit të afganëve nga Gjermania pas një sulmi tragjik në Mynih, ku një shtetas afgan plagosi të paktën 39 persona, duke shkaktuar vdekjen e një gruaje dhe vajzës së saj dyvjeçare.

Në një intervistë për gazetën gjermane “Bild”, Söder theksoi se “një fluturim nevojitet çdo javë”, duke shtuar se ministrat e Jashtme dhe të Brendshëm, Annalena Baerbock dhe Nancy Faeser, duhet të bisedojnë drejtpërdrejt me talebanët për të mundësuar dëbimin e shpejtë të afganëve të detyruar të largohen nga Gjermania.

Söder nënvizoi se në Bavari ndodhen pothuajse 2,000 afganë të cilëve u kërkohet të largohen, përfshirë 200 të cilët janë shkelës të rëndë të ligjit. Ai kërkoi që lëshimi i vizave të reja për afganët të ndalet dhe tha se Gjermania ka nevojë për një plan urgjent për Afganistanin. Kryeministri gjithashtu i referohet një sulmi tjetër të ngjashëm të kryer në janar në një qytet tjetër të Bavarisë, ku dy persona humbën jetën.

Autoritetet kanë konfirmuar se autori i sulmit të Mynihut ishte një shtetas afgan me qëndrim të ligjshëm në Gjermani.