Kryeministri Edi Rama ka theksuar se hyrja e Shqipërisë në Bashkimin Evropian do të sjellë mundësi të reja për qytetarët dhe për shtetin. Gjatë një live session-i në rrjetet sociale, Rama u përgjigj pyetjeve të komentuesve, duke theksuar rëndësinë e pashaportës evropiane për qytetarët shqiptarë.
Sipas tij, me anëtarësimin në BE, shqiptarët do të kenë mundësi të lëvizin lirisht dhe të përfitojnë mundësi më të mëdha për studime, punësim dhe mundësi financiare. Ai shtoi se, përveç mundësisë për të udhëtuar pa viza, hyrja në BE do të mundësojë një buxhet më të lartë dhe mbështetje më të madhe nga Bashkimi Evropian. Rama theksoi se aktualisht Shqipëria ka marrë mbështetje të vogël, ndërsa pas anëtarësimit, do të mund të përfitojë 300 milionë euro në vit.
“Me hyrjen në BE ne bëhemi qytetarë të një Shqipërie sa Bashkimi Evropian. Ne mund të lëvizim dhe mund të kalojmë ku të duam. Sot për sot mud të lëvizim pa viza por na ndalojnë na thonë dilni içik dhe del polici dhe sheh pashaportën dhe pyet ku po shkon, ku do rrish, dhe ksuh do të rri kërkon azil ose rri si ilegal në pritje të marin letratt. Ose kur prindërit dërgojnë fëmijët si studentët kërkojnë kuota ose tarifa më të shtrenjta. Me futjen në Be shkon si çdo student atje. Në të gjitha aspektet pashaporta ka të njëjtën vlerë dhe siguri.Përtej kësaj i duhet Shqipërisë pashaporta europiane sepse kemi një buxhet ekstra. Në gjithë këto vite kemi marrë një mbështetje dhe kemi marrë më pak se 1 milionë euro. 300 milionë euro merr kur futesh në BE dhe duhet të hyjnë në BE sepse është një mundësi që nuk e kemi pasur kaq reale dhe aktuale.”, tha Rama.
