Kryeministri Edi Rama së bashku me ministren e Infrastrukturës dhe Energjisë, Belinda Balluku, kanë inspektuar përfundimin e një nga segmentet më sfiduese të Tunelit të Murrizit, një projekt i Rrugës së Arbërit. Puna ka filluar në vitin 2018 dhe ka hasur sfida për shkak të përbërjes gjeologjike të vështirë.

“Tuneli i Murrizit – Dalja e dritës, nga bashkimi i të dy anëve të kantierit më sfidues të punëve të mëdha publike, është çasti i shumëpritur i një përpjekjeje të zgjatur nga gjeologjia tejet e pafavorshme, e cila ka sjellë shtyrjen e përfundimit të plotë të Rrugës së Arbërit,” shkruan Rama.

Ky tunel ka nisur në 2018 dhe do të përfundojë në 2024, ndërsa tuneli i Llogarasë, i cili përfundon në qershor 2024, ka nisur shumë më vonë se sa ky. Megjithatë, duke pasur një gjeologji shumë më të favorshme në Llogara, e njëjta kompani ecën me rreth 20m në ditë, ndërkohë që në Murriz përparon me afro 2m në ditë. Rama shpreh bindjen se dalja e dritës në këtë tunel është një arsye e fortë për të besuar se 2024 do ta vulosë edhe fundin e kësaj vepre kaq sfiduese.