Kryeministri i Sllovakisë, Robert Fico, është plagosur në një incident me të shtëna pas një takimi të Qeverisë në qytetin Handlova, rreth 150 kilometra në verilindje të Bratislavës, raporton televizioni sllovak TA3. Incidenti ndodhi në afërsi të kryeqytetit, duke shkaktuar tronditje dhe pasiguri në vend.

I dyshuari për sulmin është arrestuar, sipas raportimeve të TA3. Nënkryetari i Parlamentit të Sllovakisë, Lubos Blaha, konfirmoi incidentin gjatë një seance parlamentare, të cilën e shtyu për një datë të papërcaktuar, njoftoi agjencia sllovake e lajmeve, TASR. Ende nuk dihet sa rëndë mund të jetë plagosur Fico. Ai u dërgua menjëherë në spital, raportoi TASR, duke cituar Blahan.

Gazetarët që ishin në vendin e ngjarjes raportuan se dëgjuan disa të shtëna me armë. Ata shtuan se zyrtarët e sigurisë futën një person në një veturë dhe u larguan me shpejtësi. I arrestuari besohet të jetë i dyshuari që shtiu mbi kryeministrin, megjithëse kjo ende nuk është konfirmuar nga policia lokale. Zyra e kryeministrit nuk ka komentuar ende rastin.

Presidentja e Sllovakisë, Zuzana Caputova, dënoi sulmin “brutal dhe të pamëshirshëm” ndaj kryeministrit. “Jam e tronditur”, tha Caputova. “Robert Ficos i uroj shumë forcë në këtë kohë të vështirë dhe shpresoj se do të shërohet shumë shpejt nga ky sulm.”