Athinë, 25 Janar 2025 – Kryeministri grek Kyriakos Mitsotakis ka shprehur dhimbjen e tij për ndarjen nga jeta të Kryepeshkopit të Shqipërisë, Anastas Janullatos, duke e cilësuar atë si një figurë të shquar të Ortodoksisë dhe helenizmit.

Në mesazhin e tij ngushëllues, Mitsotakis theksoi kontributin e paçmuar të Kryepeshkopit Anastas në forcimin e besimit ortodoks dhe në ndërtimin e urave të bashkëjetesës paqësore midis popujve.

“Shpreh dhimbjen time për humbjen e Kryepeshkopit të Tiranës, Durrësit dhe gjithë Shqipërisë, Anastas. Kontributi i tij për Ortodoksinë është i paçmuar, me vulën e tij të pashlyer jo vetëm në vendin fqinj, por në çdo cep të tokës ku jeton dhe merr frymë helenizmi.”

Mitsotakis e vlerësoi Kryepeshkopin Anastas si një intelektual dhe shërbëtor të përkushtuar të njerëzimit, duke kujtuar angazhimin e tij në ndihmën për fëmijët e Afrikës, përkrahjen e studentëve grekë kundër diktaturës dhe përpjekjet e tij për ringritjen e Kishës Ortodokse Autoqefale të Shqipërisë pas rënies së komunizmit.

“Pata fatin të takoj dhe të punoj ngushtë me Hierarkun, i cili ndërthuri dinamizmin e besimit me mirësinë e natyrshme. Një personalitet që u bë urë mirëkuptimi mes dy shteteve.”

Në fund të mesazhit, Kryeministri grek nënvizoi se trashëgimia e Kryepeshkopit Anastas do të vazhdojë të frymëzojë brezat e ardhshëm, duke përcjellë “dritën e shpresës” nga zemra në zemër.

“I përjetshëm qoftë kujtimi i tij. I pavdekshëm dhe krijues.”