Një ditë pas takimit me emigrantët në Athinë, kryeministri Edi Rama ka ndarë një video me momentet më të bukura. Në sallën e mbushur plot me emigrantë, Rama ka zgjedhur disa prej momenteve teksa zbret nga avioni, fjalimet në sallë apo takimet me emigrantët ndërsa me ta shkrep edhe disa foto.

Krahas videos, kreu i qeverisë shkruan “videokartolinë kuqezi nga Athina”, ndërsa për të shoqëruar videon ka zgjedhur këngën e Vaçe Zelës ‘Po ku ka si ti o Shqipëria ime’.

“MIRËMËNGJES dhe me këtë videokartolinë kuqezi nga Athina, ju uroj një javë sa më të mbarë”, shkruan Rama.

Kryeministri Rama zhvilloi dje, 12 maj, një takim me emigrantët në Athinë, takim që shënoi edhe nisjen e turit me diasporën. Një fjalim më shumë se një orë, Rama i bëri një skaner marrëdhënieve shqiptaro-greke për të cilat tha se janë mijëvjeçare, teksa akuzoi politikën se ka futur përçarje mes dy popujve kaq shumë të lidhur.

Rama foli për heqjen e ligjit të luftës nga pala greke, ndërsa dha lajme të mira si për pensionet, lejet e qëndrimet dhe bashkëpunimin ekonomik.