Kryeministri Edi Rama theksoi sërish se Shqipëria nuk do të bëjë marrëveshje për emigrantët me asnjë shtet tjetër, përveç Italisë. Ai sqaroi gjatë një konference për shtyp në Berlin se marrëveshja me Italinë është unike, për shkak të lidhjes së veçantë historike dhe bashkëpunimit të thellë mes dy vendeve.

“Shqipëria ka pranuar kërkesën e Italisë, por kemi refuzuar të tjerët. Marrëdhënia jonë me Italinë është e veçantë dhe shkon pas në kohë. Italia ka qenë gjithmonë aty për ne, që nga periudha e vështirë kur dolëm nga regjimi komunist dhe Italia hapi krahët për shqiptarët. Ata ishin aty edhe kur vendi ynë po përballej me krizën financiare të piramidave dhe kur na ndihmuan pas tërmetit të tmerrshëm,” tha Rama.

Kryeministri theksoi se Shqipëria nuk është pjesë e BE-së, por është pjesë e Evropës dhe se bashkëpunimi me Italinë është një shembull i qartë i lidhjeve të ngushta që Shqipëria ka me kontinentin evropian.

“Pavarësisht se nuk jemi vend i BE-së, ne jemi pjesë e Evropës. Gjeografia jonë dhe historia jonë me Italinë flasin për bashkëpunimin e gjatë dhe domethënës. BE dhe Shqipëria duhet të qëndrojnë bashkë, duke trajtuar fenomenin e emigracionit me një qasje të përbashkët. Ndërsa goditja e emigracionit të paligjshëm është e nevojshme, ne gjithashtu duhet të punojmë për zgjidhje të qëndrueshme,” shtoi ai.

Rama përfundoi duke ritheksuar përkushtimin e Shqipërisë për anëtarësimin në BE dhe bashkëpunimin e saj besnik me unionin.