Athinë – Kryepeshkopi i Kishës Ortodokse Autoqefale të Shqipërisë, Anastas Janullatos, është transportuar me avion të Forcave Ajrore Greke në spitalin “Evangelismos” në Athinë, pas një përkeqësimi të gjendjes shëndetësore.

95-vjeçari ka pësuar një hemorragji gastrike, ndërsa gjendja e tij thuhet se është nën kontroll. Kryepeshkopi u shtrua fillimisht në një spital në Tiranë, pas disa komplikacioneve të shkaktuara nga një virozë sezonale, por përkeqësimi i situatës kërkoi ndërhyrje të specializuar.

Transporti i tij u realizua nga një ekip i specializuar mjekësor i EKAV-it, me masa të larta sigurie dhe kujdesi shëndetësor. Aktualisht, Kryepeshkopi po merr trajtimin e nevojshëm në një nga spitalet më prestigjioze të Athinës.

Kryepeshkopi Anastas Janullatos është një figurë e shquar për ringritjen e Kishës Ortodokse Autoqefale të Shqipërisë, pas rrëzimit të regjimit komunist. Gjendja e tij po monitorohet nga afër nga mjekët, ndërsa priten të dhëna të mëtejshme mbi përmirësimin e tij.