Me rastin e festës së Pashkës, kryepeshkvi i Tiranë–Durrësit, Arjan Dodaj, ka uruar të gjithë besimtarët e krishterë duke përcjellë një mesazh reflektimi dhe bashkimi për shoqërinë shqiptare.

Në fjalën e tij, Dodaj theksoi rëndësinë e largimit nga interesat e momentit dhe nevojën për një angazhim të përbashkët në promovimin e vlerave hyjnore dhe njerëzore.

“Kemi nevojë për njerëz që nuk mbyllen tek interesi i momentit. Mesazhi dhe angazhimi i parë jo vetëm i fesë por edhe i çdo institucioni shqiptar duhet të jetë hyjnor,” u shpreh kryepeshkvi.

Ai uroi që festa e Pashkës të shërbejë si bekim për familjet shqiptare dhe si shtysë për të forcuar themelet e shoqërisë përmes kulturës së punës së ndershme.

“Urimi i kësaj feste le të jetë që populli, kombi dhe shteti shqiptar të vijojë me bekimin hyjnor për familjen shqiptare. Të bëhemi bashkë për të promovuar kulturën e punës së ndershme,” vijoi ai.

Në fund të mesazhit të tij, Arjan Dodaj bëri thirrje për të ringjallur shpresën për një të ardhme më të mirë, më të jetuar dhe më të ndriçuar nga dashuria dhe vlerat shpirtërore.