Kryesia e Kuvendit të Kosovës u mblodh për herë të parë pas konstituimit të dytë me synimin për të formuar trupat parlamentare dhe për të shqyrtuar buxhetin e shtetit dhe buxhetin për tre komuna, por sipas kryetarit të Kuvendit, Dimal Basha, mbledhja nuk prodhoi rezultat pozitiv.

“Nuk është e zakontë me u mbledhë kryesia, por unë mendoj që ose së paku kam pritë se sikur të kishte vullnet politik ka qenë bindja ime e thellë që s’ka pasë shkelje ligjore e Kushtetuese për me i themelu komisionet”, deklaroi Basha.

Partitë politike refuzuan vazhdimin e punës së Kuvendit, duke argumentuar se rregullorja e punës kërkon fillimisht votimin e qeverisë. Presidentja Vjosa Osmani ka ftuar partitë në konsultime të premten për këtë çështje. PDK-ja konfirmoi pjesëmarrjen, por shtoi se nuk ekziston një shumicë e re parlamentare për formimin e qeverisë.

Nënkryetarja e Kuvendit, Vlora Çitaku, tha se vendi nuk ka kohë për të humbur dhe se nuk duhet të ketë taktizime: “Kosova nuk ka kohë për të humbur, nuk e kemi as edhe një ditë për të humbur. Është e qartë që nuk ka shumicë të re parlamentare.”

Lëvizja Vetëvendosje u rezervua për koment, duke theksuar se vendi është drejt zgjedhjeve. Nënkryetarja Albulena Haxhiu theksoi: “Gjithçka në kohën e vet, nesër do të japim qëndrimin e Lëvizjes Vetëvendosje. Presidentja mund të shpallë zgjedhjet ose të caktojë mandatarin për formimin e qeverisë.”

Më 26 tetor, Albin Kurti nuk arriti të zgjidhej kryeministër për mungesë numrash. Presidentja e Kosovës ka afat deri më 5 nëntor për të caktuar mandatarin e dytë për formimin e qeverisë.