Vezët njihen prej kohësh si një nga ushqimet më të pasura me vlera ushqyese – të mbushura me proteina, vitamina dhe minerale, ato janë pjesë e pandashme e një diete të shëndetshme. Për më tepër, konsumi i rregullt i tyre kontribuon në forcimin e sistemit imunitar, duke ndihmuar trupin të luftojë viruset dhe infeksionet.

Megjithatë, ekspertët paralajmërojnë se vezët nuk janë gjithmonë të padëmshme. Ato mund të bëhen burim i baktereve të rrezikshme nëse konsumohen pas prishjes. Një nga shenjat më të zakonshme që tregon se veza nuk është e sigurt për konsum është ndryshimi i ngjyrës në të bardhën e saj.

Sipas specialistëve të sigurisë ushqimore, nëse vëreni një nuancë margaritare apo rozë në të bardhën e vezës, është më mirë ta hidhni menjëherë. Kjo ngjyrë e pazakontë mund të tregojë praninë e bakterit Pseudomonas, i cili prodhon pigmente dhe është potencialisht i dëmshëm për shëndetin.

Normalisht, një vezë e freskët ka një të verdhë të qëndrueshme dhe një të bardhë të trashë. Me kalimin e kohës, e bardha bëhet më e lëngshme dhe humbet qëndrueshmërinë – një tjetër tregues që mund të sinjalizojë freskinë ose mungesën e saj.

Për të shmangur rrezikun, këshillohet që vezët të ruhen në temperaturë të përshtatshme dhe të kontrollohen para përdorimit, jo vetëm për datën e skadencës, por edhe për pamjen dhe erën. Një vezë e prishur zakonisht ka një aromë karakteristike të rëndë dhe të pakëndshme.

Në rast dyshimi, më mirë ta hidhni – se sa të rrezikoni shëndetin.