Një incident i rëndë është regjistruar pasditen e sotme në Kukës, ku një inspektor i Policisë Rrugore është konfliktuar fizikisht me disa persona gjatë ushtrimit të detyrës së tij.

Sipas njoftimit paraprak të Policisë së Kukësit, rreth orës 17:00, inspektori Q.D. ka raportuar se është sulmuar fizikisht në rrugën që të çon në fshatin Pobreg. Ngjarja dyshohet të ketë ndodhur si pasojë e detyrës së tij si efektiv policie.

Aktualisht, punonjësi i Policisë po jep kallëzimin pranë Oficerit të Policisë Gjyqësore të Prokurorisë. Nga hetimet e para është identifikuar një prej personave të përfshirë në konflikt, i cili kishte pasur një përplasje verbale me policin edhe disa ditë më parë.

Policia njofton se po vijojnë hetimet për zbardhjen e plotë të rrethanave të ngjarjes dhe për identifikimin e personave të tjerë të përfshirë në sulm.