Një nga momentet më prekëse të bisedës në podcastin e Grida Duma ishte rrëfimi i Anita Haradinaj për humbjen e nënës së saj, një dhimbje që, sipas saj, vazhdon të jetë e pranishme edhe pas shumë vitesh.

Gjatë bisedës, ajo tregoi se në jetë ka kaluar periudha të vështira dhe sfida të shumta, përfshirë edhe kohën kur bashkëshorti i saj, Ramush Haradinaj, ndodhej në proces gjyqësor në Gjykata Penale Ndërkombëtare për ish‑Jugosllavinë. Megjithatë, sipas saj, asnjë moment nuk ka qenë më i rëndë sesa humbja e nënës.

“Kur e kam humbur mamin, aty kam mbetur shumë vetëm. Shumë vetëm. Ajo ka qenë më e vështira. Kanë kaluar 13 vite dhe prapë ndihem vetëm”, u shpreh Haradinaj me emocione.

Ajo theksoi se mungesa e nënës ndihet edhe në momentet më të zakonshme të jetës së përditshme, sidomos kur sheh miqtë dhe të afërmit që ende kanë mundësinë të kalojnë kohë me prindërit e tyre.

“Kur shoqet e mia shkojnë te mamatë e tyre, u them: hajde kënaqu, shijoje, sepse je me fat që e ke”, rrëfeu ajo gjatë bisedës.

Rrëfimi i saj u shndërrua në një nga momentet më emocionale të intervistës, duke treguar anën personale dhe të ndjeshme të jetës së saj përtej jetës publike.