Teksa po afrohet starti i edicionit të tretë të Ferma VIP, i cili sipas raportimeve pritet të nisë më 20 mars, kanë filluar të qarkullojnë edhe emrat e parë të personazheve që mund të bëhen pjesë e spektaklit.

Në listën jozyrtare që po përflitet në media dhe rrjete sociale përmenden disa figura të njohura të artit dhe ekranit shqiptar. Mes tyre janë këngëtarja Jonida Maliqi, aktori Romir Zalla, poetja dhe shkrimtarja Mimoza Ahmeti si dhe Akil Varfi. Po ashtu në këtë listë përmenden edhe Ledian Agallijaj dhe Indri Shiroka, të cilët sipas raportimeve mund të jenë pjesë e garës në fermë.

Së fundmi janë përmendur edhe dy emra të tjerë që sipas raportimeve konsiderohen tashmë të sigurt për pjesëmarrje: reperi Fero dhe ish-banorja e disa reality show-ve Ermiona Lekbello.

Ndërkohë, në prapaskenë po flitet edhe për rolet jashtë garës. Raportohet se këngëtarja Inida Gjata mund të jetë pjesë e programit në rolin e opinionistes, ndërsa balerini Ilir Shaqiri përflitet për rolin e “kryeplakut”.

Vëmendje të veçantë ka marrë edhe çështja e moderimit. Prej disa ditësh qarkullonin aludime se prezantimin e këtij edicioni mund ta merrte përsipër moderatorja e njohur Arbana Osmani. Dyshimet u shtuan pasi ajo publikoi në rrjetin social Instagram promon e spektaklit, duke konfirmuar kështu se do të jetë në drejtimin e sezonit të tretë të “Ferma VIP”.