Në një përpjekje të nëntë të pasuksesshme, deputetët e Kuvendit të Kosovës nuk arritën as të enjten të konstituojnë Kuvendin, pasi propozimi për votim të fshehtë për kryetar Kuvendi, i bërë nga kryesuesi Avni Dehari, nuk kaloi. Në këtë seancë nuk u propozua asnjë emër për kryetar nga Lëvizja Vetëvendosje, partia fituese e zgjedhjeve të 9 shkurtit.

Nga 110 deputetë prezentë, votuan vetëm 55, prej të cilëve 54 votuan pro dhe 1 kundër. Pjesa tjetër e opozitës – PDK, LDK dhe AAK – refuzuan të votojnë, duke paralajmëruar se nëse procedurat do të vazhdojnë në këtë formë, do ta çojnë çështjen në Gjykatën Kushtetuese.

Reagimet politike:

Memli Krasniqi (PDK) tha se po krijohet një precedent i paprecedentë që nga shpallja e pavarësisë së Kosovës, duke e cilësuar mënyrën e propozuar si të paligjshme dhe arbitrare:

“Mos e ktheni Kuvendin në cirk. Kur nuk i keni votat në mënyrë transparente, si mund t’i keni në mënyrë të fshehtë? A ka ndonjë pazar që ne nuk e dimë? Po krijoni precedentë antikushtetues”.

Hykmete Bajrami (LDK) e quajti veprimin arbitrar dhe shkelje të rregullores dhe kushtetutës, duke theksuar se LDK nuk do të bëhet pjesë e një shkeljeje të tillë.

Time Kadrijaj (AAK) po ashtu u shpreh kundër votimit të fshehtë dhe kërkoi respektimin e procedurave kushtetuese.

Fatmir Limaj (Nisma):

Kreu i Nismës Socialdemokrate, që ka tri mandate në Kuvend, tha se pa një marrëveshje politike, nuk mund të ketë konstituim të Kuvendit dhe formim të qeverisë:

“Vetëm një marrëveshje politike që përcakton shumicën parlamentare mund ta zhbllokojë këtë situatë.”

Në këtë situatë, Kuvendi i Kosovës mbetet i bllokuar, ndërsa kriza institucionale po thellohet, pa një marrëveshje mes partive politike për emrin e kryeparlamentarit dhe ndarjen e posteve drejtuese.