Kuvendi i Shqipërisë do të rinisë punimet më 2 shtator, pasi pushimet për deputetët kanë përfunduar. Ky sesion i ri parlamentar pritet të jetë i ngarkuar dhe i tensionuar, me angazhime maksimale nga të gjitha palët politike.

Të hënën, është planifikuar të mbahet konferenca e kryetarëve për të përcaktuar kalendarin e punës. Kjo mbledhje do të udhëhiqet nga Kryetarja e re e Parlamentit, Elisa Spiropali, e cila ka marrë zyrtarisht detyrën e saj.

Gjithashtu, gjatë fundjavës, opozita pritet të vendosë për mbledhjen e grupit parlamentar të drejtuar nga Gazmend Bardhi, ku deputetët do të marrin direktivat për sjelljen e tyre gjatë sesionit të ri. Po ashtu, më 1 shtator, Niko Peleshi do të mbajë mbledhjen e parë me deputetët socialistë si kryetar i grupit.

Sesioni i fundit parlamentar i kësaj legjislature ka ndihmuar në uljen e tensioneve mes mazhorancës dhe opozitës, duke përfshirë një rikthim në marrëveshjet për ndryshimet në Kodin Zgjedhor. Ndërkohë që Shqipëria është në vitin elektoral, retorika dhe veprimet politike, veçanërisht të opozitës, pritet të jenë më luftarake, megjithatë për momentin, kjo duket se është e kundërta.

Nga mbledhja urgjente e Këshillit të Legjislacionit, e zhvilluar më 27 gusht, ku u diskutua mandati i socialistes Olta Xhaçka, është evidentuar se shumica socialiste dhe opozita janë të prirur të arrijnë marrëveshje. Këshilli Legjislacionit ka vendosur që çështja e mandatit të Olta Xhaçkës të vijojë në seancën e 12 shtatorit në parlament.