Kuvendi i Shqipërisë vijoi deri pas orës 01:30 diskutimet maratonë mbi projektbuxhetin e shtetit për vitin 2026, duke shqyrtuar nen për nen shpenzimet dhe amendamentet e propozuara nga mazhoranca dhe opozita.

Projektbuxheti për vitin 2026, me një vlerë prej rreth 887 miliardë lekësh, vendos në qendër qytetarin dhe synon të mbështesë rritjen e pensioneve, pagën minimale, si dhe investime të mëdha në infrastrukturë, energji, arsimin dhe bujqësinë. Shpenzimet operative parashikojnë 81 milionë lekë, prej të cilave 56,7 milionë janë kategori të pacenueshme.

Mazhoranca e ka konsideruar projektin si një instrument ambicioz për integrimin europian të vendit, ndërsa opozita paraqiti një sërë amendamentesh për të rritur buxhetin e arsimit dhe për të kufizuar favorizimet, të cilat u rrëzuan.

Përveç rritjes së pensioneve dhe pagës minimale, projektbuxheti parashikon:
• Rritje të pensioneve urbane: pensioni me vite të plota pune do të arrijë 40 mijë lekë në vitin 2030, nga 27 350 lekë aktualisht; pensioni i pjesshëm urban në 22 mijë lekë; pensioni rural në 18 mijë lekë; pensioni familjar në 18 mijë lekë; pensioni i invaliditetit në 30 mijë lekë.
• Rritje të pagës minimale në 50 mijë lekë nga 1 janari 2026, për rreth 308 mijë të punësuar në sektorin publik dhe privat.

Paqja Fiskale u miratua me 75 vota pro, pavarësisht kritikave të opozitës se ligji mund të hapë “autostrada” për pastrimin e parave. Deputetët rrëzuan të gjitha amendamentet e propozuara nga opozita dhe disa nga mazhoranca, duke theksuar se ligji synon të adresoje evazionin fiskal dhe të mbështesë investimet e ligjshme.

Gjithashtu, Kuvendi miratoi një seri projektligjesh të tjera fiskale:
• Ndryshime në ligjin për procedurat tatimore (81 vota pro).
• Ndryshime në ligjin për TVSH-në (80 vota pro).
• Ndryshime në ligjin për tatimin mbi të ardhurat (84 vota pro).
• Shtesa në ligjin për sistemin e taksave vendore (81 vota pro).
• Ndryshime në ligjin për faturën dhe sistemin e monitorimit të qarkullimit (81 vota pro).
• Projektligji për rivlerësimin e pasurisë së paluajtshme (76 vota pro).

Seanca maratonë shënoi një nga debatet më intensive mbi buxhetin dhe ligjet fiskale, ndërsa mazhoranca dhe opozita u përballën mbi prioritetet e shpenzimeve dhe pastrimit të parave, duke reflektuar tensionet politike në Kuvend.