Burime zyrtare kanë bërë me dije se seanca e planifikuar e Kuvendit të Shqipërisë për datën 10 tetor është shtyrë. Kuvendi ka njoftuar grupet parlamentare se seanca plenare do të zhvillohet më 17 tetor, me një rend dite të përbashkët sipas kalendarit të punimeve.

Ndonëse arsyet zyrtare të shtyrjes nuk janë bërë publike, vizita e presidentit turk Rexhep Tajip Erdogan, i cili do të ndodhet në Tiranë nesër për të inauguruar xhaminë e Namazgjasë pranë Parlamentit, mund të jetë një faktor që ka ndikuar në këtë vendim. Sakaq, pritet që disa deputetë të mazhorancës, përfshirë kryeministrin dhe ministrat, të marrin pjesë në pritjen zyrtare për presidentin Erdogan.

Në anën tjetër, Partia Demokratike kishte paralajmëruar një aksion të ri opozitar në Parlament, duke tentuar të përsërisë kaosin e dy seancave të mëparshme. Megjithatë, për momentin, njoftohet se veprimet opozitare do të mbahen për një ditë tjetër, me seancën e radhës që pritet të zhvillohet më 17 tetor.