Sulmuesi i njohur francez, Kylian Mbappé, ka dalë fitues në procesin gjyqësor kundër Paris Saint-Germain, duke përfituar një dëmshpërblim prej rreth 60 milionë eurosh.

Konflikti mes Mbappé-së dhe klubit francez filloi në vitin 2023, kur ylli i futbollit vendosi të mos e rinovonte kontratën që skadonte në verën e vitit 2024, duke njoftuar transferimin e tij te Real Madrid. Gjykata e punës në Paris (Conseil de prud’hommes de Paris) vendosi se PSG i detyrohej sulmuesit shumën në kuadër të një mosmarrëveshjeje që lidhej me paga dhe bonuse të papaguara pas përfundimit të kontratës.

Avokatët e Mbappé-së kishin pretenduar se klubi i detyrohej mbi 260 milionë euro, ndërsa PSG kërkonte 440 milionë euro dëmshpërblim nga lojtari për dëmet e shkaktuara nga largimi i tij si transferim i lirë. Përfaqësuesit e sulmuesit e kanë cilësuar vendimin si një konfirmim të respektimit të angazhimeve ligjore edhe në industrinë e futbollit profesional.

Nga ana e PSG-së nuk ka pasur ende një reagim zyrtar pas këtij vendimi.