I dërguari i Bashkimit Evropian për dialogun Kosovë-Serbi, Mirosllav Lajçak, ka deklaruar të mërkurën vonë se sugjerimet se BE-ja është kundër hapjes së urës kryesore mbi lumin Ibër, ose që ka ndryshuar pozicionin e saj mbi këtë temë, janë mashtruese. Ai theksoi se çdo vendim që merret kundër vullnetit të njerëzve të prekur nuk kontribuon në normalizimin e marrëdhënieve.

Lajçak paralajmëroi se çështja e zbatimit të marrëveshjes për urën do të diskutohet në takimin e radhës në Bruksel, megjithatë nuk dha ndonjë datë konkrete për këto bisedime.

Ura mbi lumin Ibër, që ndan Mitrovicën Jugore me shumicë shqiptare dhe Mitrovicën Veriore me shumicë serbe, është e hapur për këmbësorët, por jo për vetura. Kohët e fundit, autoritetet e Kosovës kanë nisur inspektime dhe kanë paralajmëruar hapjen e saj, një veprim që ka ngjallur reagime ndërkombëtare.

Ambasadori amerikan në Kosovë, Jeffrey Hovenier, ka shprehur shqetësimin se hapja e urës në këtë moment mund të rrezikojë ushtarët amerikanë, dhe se për këtë arsye, nuk duhet të ndodhë tani.

Në mënyrë të ngjashme, misioni i NATO-s në Kosovë, KFOR, ka paralajmëruar se do të ndërhyjë për të ruajtur sigurinë në rast të ndonjë zhvillimi të pakontrolluar dhe ka theksuar se çdo vendim për urën duhet të merret përmes dialogut të ndërmjetësuar nga BE-ja.

Zëvendëskryeministri i Kosovës, Besnik Bislimi, ka theksuar se çështja e hapjes së urës mbi Ibër nuk është një vendim i njëanshëm i Qeverisë dhe nuk përbën një çështje të pazgjidhur në dialogun me Serbinë. Ai gjithashtu ka kritikuar BE-në për kërcënimet ndaj Kosovës në lidhje me zbatimin e marrëveshjes.

Ndërkohë, Petar Petkoviq, drejtori i Zyrës për Kosovën në Qeverinë e Serbisë, ka akuzuar udhëheqësit kosovarë për provokimin e konflikteve të reja, duke thënë se ata nuk janë të interesuar për marrëveshje.

Kryeministri i Kosovës, Albin Kurti, ka deklaruar se do të vazhdojë konsultimet me partnerët ndërkombëtarë për hapjen e urës, një qëndrim që është mirëpritur nga njohësit e çështjeve politike.