Kreu i Kadastrës, Artan Lame bëri të ditur sot se, operacioni për konfiskimin e ndërtimeve pa leje ishte një masë efikase që tregoi se, edhe oligarkët ndëshkohen nëse e thyejnë ligjin. Gjatë një konference për mediat lidhur me analizën e punës për vititn 2022, Lame tha se, ky operacion ka ulur shkeljet në ndërtime në nivelin afër zeros.

“Sa kohë çdo leje ka një listë gjërash që lejohen dhe nuk lejohen është e drejta e shtetit të ta kujtojë. Ka pasur efekt në uljen në nivelit afër zero të shkeljes në ndërtime. E morën vesh që qenka dhe serioze kjo punë. Jam pro si masë”, tha Lame.

Lame po ashtu propozoi për uljen e taksës së banesës, e cila aktualisht është 15%. Lame tha se, nëse kjo taksë do të ulej në 6 ose 8% do bëntë që qytetarët të ishin më të prirur që ta paguanin dhe kështu do të shmangej evazioni fiskal që bëjnë me apartamentet përmes noterëve, duke ulur vlerën e tyre apo duke u përpjekur të fshehin pasuritë.
“Ligjërohet shumë më tepër pronësi sesa sot që mundohen të gjejnë lloj-lloj shtigjesh nëpërmjet noterëve. Kërkon një analizë të thelluar dhe bisedime me qeverinë nëse do e pranonte”, tha Lame.