Sot iu dha lamtumira e fundit reperit Mentor Palokaj, vdekja e të cilit tronditi opinionin publik të dielën. Në ceremoninë mortore morën pjesë shumë miq, familjarë dhe artistë të njohur nga industria e muzikës shqiptare.

Një nga momentet më prekëse të ceremonisë ishte mesazhi i vëllait të tij, reperit të njohur Unikkatil (Viktor Palokaj), i cili emocionoi të gjithë të pranishmit me fjalët e tij lamtumirëse:

“Me siguri plot prej juve sot e keni pasur për zemër. Edhe u gjet aty për juve, e faleminderit që keni ardhë. Ishalla shihna me to në botën tjetër. Vëllau jem, u shifshim përsëri, pushofsh në paqe.”

Në ceremoninë e varrimit ishin të pranishëm edhe shumë figura të njohura nga skena e muzikës shqiptare, si Mc Kresha, Gold AG dhe Blero, të cilët i dhanë lamtumirën e fundit kolegut dhe mikut të tyre.

Mentor Palokaj, i njohur ndryshe me nofkën artistike “Tee”, u gjet i vdekur të dielën në një banesë në lagjen Arbëria në Prishtinë. Policia, e cila po heton rrethanat e vdekjes, ka bërë të ditur se në vendngjarje është gjetur një armë zjarri si dhe një substancë e dyshuar narkotike.

Ndërkohë, komuniteti artistik dhe fansat vazhdojnë të shprehin ngushëllimet dhe dhimbjen e tyre për humbjen e papritur të reperit.