Kreu i Lidhjes Demokratike të Kosovës, Lumir Abdixhiku, ka shpallur fitoren e partisë së tij në zgjedhjet lokale të së dielës, duke e cilësuar rezultatin si “rikthim historik” për LDK-në.

Në një deklaratë për mediat nga selia e partisë, Abdixhiku tha se LDK ka fituar në raundin e parë në Istog, Lipjan dhe Junik, ndërsa është në garë për fitore në 12 komuna të tjera.

“Kemi fituar në tre komuna dhe prijnë në dymbëdhjetë të tjera. Shpallim fitore të plotë në Istog, Lipjan dhe Junik, ndërsa jemi shumë pranë fitores edhe në Pejë,” deklaroi Abdixhiku.

Ai theksoi se për herë të parë pas 12 vitesh, LDK është forca e parë politike në Prishtinë, si për kryetar komune ashtu edhe për Kuvend Komunal.

Sipas tij, partia po prin gjithashtu në Viti, Obiliq dhe Dragash, ndërsa është në balotazh në Fushë Kosovë, Suharekë, Gjilan dhe Rahovec.

“LDK po tregon se mbetet partia e stabilitetit dhe e qeverisjes së përgjegjshme në Kosovë,” u shpreh Abdixhiku, duke falënderuar qytetarët për besimin e dhënë në këto zgjedhje.