Në zona ku dikur dëgjohej vetëm zhurma e zogjëve dhe insekteve, tani janë zhvendosur pajisje të rënda për të hapur llogore të mëdha në kufirin mes Letonisë dhe Rusisë. Letonia ka vendosur të investojë rreth 303 milionë euro në pesë vitet e ardhshme për një projekt të madh fortifikimi të kufirit lindor, në kuadër të përforcimit të mbrojtjes së saj kundër kërcënimeve potenciale nga Rusia.

Kaspar Lazdins, inxhinier i lartë i forcave të armatosura të Letonisë, ka shpjeguar për mediat lokale se plani përfshin gërmimin e llogoreve dhe forcimin e zonës me struktura mbrojtëse të njohura si “dhëmbë dragoi”. Projekti nuk do të përdorë vetëm burimet shtetërore, por edhe kompanitë civile do të jenë të përfshira në realizimin e tij.

Kur gazetarë të Radios Evropa e Lirë vizituan zonën kufitare në Terehova, panë një kolonë të madhe kamionësh në këtë pikë kalimi që është një nga më të frekuentuarat në kufirin lindor të Letonisë. Terehova ndodhet pranë një autostrade që të çon direkt në Moskë dhe është afër kufirit me Bjellorusinë.

Në vitin 2019, në këtë zonë kufitare u ndërtua një mur me tela me gjemba për të parandaluar kalimin e migrantëve ilegalë nga Rusia. Tani, përveç këtij mure, do të shtohen edhe fortifikime masive ushtarake, si pjesë e planit të Rigas për përforcimin e kufirit lindor.

Banorët lokalë kanë përzierje ndjenjash rreth zhvillimeve të fundit. Inna Dukshta, punëtore e administratës në fshatin Pasiene pranë pikës kufitare në Terehova, tha se kufiri nuk i shqetëson më, pasi kanë jetuar aty gjatë gjithë jetës së tyre. Ndërkohë, Yulia, një nënë e re në fshat, shprehu shqetësimin e saj për të ardhmen dhe për afërsinë me kufirin rus, duke theksuar se ndonëse nuk mendon për këtë sot, është e shqetësuar për atë që mund të ndodhë në 20 vitet e ardhshme.

Në afërsi të pikës kufitare, janë vënë re mbishkrime “Ne jemi NATO” në gjuhën letoneze, që pasqyrojnë solidaritetin dhe përkushtimin e Letonisë ndaj Aleancës së Atlantikut të Veriut, në një periudhë kur kërcënimet nga Rusia mbeten të larta.