Një ngjarje e rëndë ka tronditur qytetin e Lezhës, ku një i mitur është rrëmbyer me forcë, dhunuar dhe ngacmuar seksualisht. Policia ka ndaluar dy të rinj 19-vjeçarë, të dy banues në Malsi, Njësia Administrative Kolsh, Lezhë.

Sipas deklaratës së policisë, arrestimi i tyre u bë pas kallëzimit të një 17-vjeçari në Komisariatin e Policisë Lezhë. Sipas kallëzimit, më 21 korrik 2022, rreth orës 22:30, dy të rinjtë e morën 17-vjeçarin në automjet pa dëshirën e tij dhe e çuan në drejtim të fshatit Kolsh-Malsi, Njësia Administrative Kolsh, Bashkia Lezhë. Pasi ndaluan automjetin, ata e shantazhuan 17-vjeçarin me video duke e nxjerrë “Live” në rrjetin social “TikTok” dhe e detyruan të përdorte fjalë fyese në video. Këto veprime u shoqëruan me dhunë fizike dhe ngacmim seksual ndaj të miturit.

Policia ka njoftuar se materialet procedurale në ngarkim të të arrestuarve do t’i kalojnë Prokurorisë pranë Juridiksionit të Përgjithshëm Lezhë për veprime të mëtejshme ligjore për veprat penale “Dëmtime të tjera me dashje”, “Kanosja” dhe “Ngacmimi seksual”.