Liderja e partisë së majtë opozitare Podemos në Spanjë, Ione Belarra, ka kërkuar që qeveria e koalicionit të majtë të ndërpresë marrëdhëniet me Izraelin. Ajo e shprehu këtë kërkesë gjatë një fjalimi në seancën e Asamblesë së Përgjithshme të Parlamentit, ku u diskutua çështja e migracionit, në prani të kryeministrit Pedro Sanchez.

Belarra kritikoi qeverinë për reagimin e saj të pamjaftueshëm ndaj gjenocidit të Izraelit në Gaza, duke bërë pyetje retorike që theksonin kontradiktat në politikën spanjolle. “Si është e mundur që delegacioni spanjoll qëndroi në Asamblenë e Përgjithshme të Kombeve të Bashkuara (OKB) për të dëgjuar një terrorist si kryeministri izraelit Benjamin Netanyahu? Si është e mundur që vazhdohet t’i shiten armë Izraelit? Si është e mundur të mos shkëputen marrëdhëniet me një shtet terrorist, i cili prej një viti kryen terrorizëm në Gaza?” u shpreh ajo.

Po ashtu, në një mesazh të publikuar në llogarinë e saj në median sociale më 8 tetor, Belarra theksoi se “një vit më parë në duart e shtetit terrorist të Izraelit filloi faza e fundit e gjenocidit palestinez.” Ajo përmendi se me bashkëfajësinë e SHBA-së dhe Evropës, mbi 42 mijë persona ishin vrarë, ndërsa qindra mijëra të tjerë ishin plagosur dhe zhdukur. “Barbaria vazhdon të përparojë dhe vazhdon të na tërheqë poshtë për shkak se nuk kemi mundur ta ndalojmë,” përfundoi Belarra.