Parlamenti grek ka miratuar pas debateve të shumta projektligjin që lejon punë deri në 13 orë në ditë, shkruan tgcom24.

Qeveria konservatore e ‘Demokracisë së Re’ e quan ligjin një reformë që promovon “punë të drejtë dhe fleksibël për të gjithë”, ndërsa sindikatat greke e konsiderojnë atë si legjitimimin e “skllavërisë së paguar”.

Ligji, i nënshkruar nga ministri i Punës Niki Kerameos, përcakton se punonjësit e sektorit privat mund të punësohen nga i njëjti punëdhënës për 13 orë në ditë (përveç orarit standard 8-orësh) për jo më shumë se 37 ditë në vit, bazuar në vullnetin e tyre. Orët shtesë do të kompensohen me një rritje page prej 40%.

Një ligj aktual, i miratuar gjithashtu nga konservatorët dy vjet më parë, lejonte ditë pune 13-orëshe, por vetëm për dy punëdhënës të ndryshëm.

Pavarësisht protestave nga përfaqësuesit e punëtorëve, partia në pushtet, me shumicën në parlament, ka vendosur të vazhdojë përpara. Ky projektligj u miratua edhe pse gjatë këtij muaji u organizuan dy greva të përgjithshme, me pankarta që e konsideronin këtë iniciativë si “kthimi i të drejtave të punës në Mesjetë”.

Konfederata e Përgjithshme e Punëtorëve Grekë ka deklaruar se reforma “rrezikon shëndetin dhe sigurinë e punonjësve dhe shkatërron çdo ekuilibër midis jetës personale dhe profesionale”.