Deputeti i Partisë Demokratike për qarkun e Fierit, Luan Baçi, është thirrur sot në Prokurorinë e Posaçme kundër Korrupsionit dhe Krimit të Organizuar (SPAK) për t’u marrë në pyetje nga Byroja Kombëtare e Hetimit (BKH). Kallëzimi është bërë nga një qytetar, i cili ka akuzuar Baçin për fshehje pasurie.

Pas daljes nga SPAK, Baçi deklaroi për gazetarët se çështja e tij ishte hetuar dhe mbyllur më parë pa asnjë problematikë, pasi pasuria e tij është e dokumentuar dhe transparente. Ai përmendi se i njëjti person kishte bërë një tjetër kallëzim të ngjashëm, duke nënkuptuar se ky ishte një sulm i përsëritur nga individë që ai i cilësoi si “patronazhistë” dhe “ballistë”. Sipas tij, SPAK mund të ketë reaguar për të “plotësuar dëshirën e qytetarëve,” ndërsa ai u shpreh i qetë dhe i bindur për pastërtinë e aktivitetit të tij.

“Ka qenë një kallëzim dhe është pushuar si çështje. Është hetuar pasuria ime fill e për pe. Në të gjitha detajet pa asnjë lloj problemi. Unë kam transparencë të plotë të punëve dhe biznesit tim.Jam shumë i qetë. Shumë normal. Nuk kam asnjë lloj problemi. Është mbyllur si çështje. I njëjti kallëzues patronazhist, ballist ka ardhur përsëri e ka bërë kallëzim.

Ndoshta dhe SPAK për t’i bërë qejfin qytetarëve, edhe kur kanë mjeranë të tillë që nuk dijnë të bëjnë gjë tjetër vetëm të bëjnë kallëzime të tilla,  unë u paraqita”, tha ai