Deputeti i Partisë Demokratike, Luciano Boçi, ka reaguar pas vendimit të Gjykatës së Posaçme për Korrupsionin dhe Krimin e Organizuar (GJKKO) ndaj Sali Berishës. Ai ka kritikuar ashpër sistemin e drejtësisë në Shqipëri, duke e cilësuar atë si të “pushtuar nga frika politike” dhe të verbuar nga “revanshi politik”.

Në një postim të tij në rrjetet sociale, Boçi ka shpërndarë mendimin se drejtësia ka shërbyer si një mjet për interesat politike, duke përdorur SPAK-un si “kapak” për mbrojtjen e Edi Ramës dhe “dajak” për opozitën. Ai ka theksuar se vendimi i GJKKO është një dëshmi e padrejtësisë dhe ka ftuar qytetarët të bashkohen me opozitën për të kërkuar një drejtësi të vërtetë dhe të pavarur nga politika.

“Një drejtësi politike që përdor një SPAK për kapak për Ramën e krimet e tij, një SPAK si kajmak për vemjet e dala nga gjirizi sorosian e një SPAK si dajak për opozitën dhe që përdor GJKKO për ta çuar drejtësinë në K.O, është një Padrejtësi e padurueshme,” shkruan Boçi, duke kritikuar ndihmën që drejtësia ka dhënë për forcimin e pushtetit të mazhorancës.