Ministri i Jashtëm turk Mevlüt Çavuşoğlu u takua të enjten në Lviv me homologun e tij ukrainas Dmytro Kuleba, një ditë pas vizitës që pati në Moskë dhe bisedoi atje me homologun rus Sergei Lavrov.

“Nëse arrihet një marrëveshje për çështjet për të cilat ne shohim një afrim, ekziston mundësia që dy liderët të bashkohen”, tha Çavuşoğlu duke iu referuar presidentit rus Vladimir Putin dhe Presidentit ukrainas Volodymyr Zelensky.

Çavuşoğlu tha gjithashtu se shpresat e tij për një armëpushim u rritën pas takimit me të dyja palët, megjithëse “është e vështirë të flitet për këtë kur bëhet fjalë për luftën”.

Ai tha se Ukraina kishte sugjeruar dhe propozuar dy shtetet, Turqinë dhe Gjermaninë si vende garantuese në një “marrëveshje kolektive të sigurisë”.

“Në bisedimet e mia të djeshme në Moskë, pashë se Federata Ruse nuk kishte asnjë kundërshtim për këtë dhe se ata mund ta pranonin një propozim të tillë”, tha Çavuşoğlu.

Ai theksoi se një marrëveshje duhet të jetë e pranueshme për të dyja palët dhe popullin e tyre.