Presidenti Ilir Meta ka mbajtur fjalën e tij në forumin global të Bakusë “Rezistenca globale, bashkëpunimi global”. Meta u shpreh se lufta në Ukrainë nuk i ndau por i bashkoi kombet.

Ai deklaroi se presidenti rus Vladimir Putin donte një NATO më të paktë por po përballet me një NATO të zgjeruar me shumë prani në pjesë lindore të Aleancës.

Ndalur tek Ballkani Perëndimor, Meta theksoi se Ballkani Perëndimor është i shqetësuar për ndërhyrjen e përfaqësuesve rusë të cilët synojnë të minojnë demokracinë dhe stabilitetin.

“Në Forumin IX Global të Bakusë “Rezistenca globale, bashkëpunimi global” theksova sot se lufta në Ukrainë prodhoi efektin e kundërt të asaj që priste Rusia. Nuk i ndau, por i bashkoi kombet tona.

Putini donte një NATO më të paktë, por ai po përballet me një NATO më të zgjeruar, me më shumë prani të NATO-s në pjesën lindore të Aleancës dhe gjithashtu, edhe me më shumë anëtarë të Aleancës Atlantiko-Veriore.

Ky peizazh i ri gjeopolitik e konsideron të nevojshme një qasje të re të BE-së dhe NATO-s për zgjerimin dhe sigurinë kolektive.

Zgjerimi duhet të konsiderohet një instrument i fuqishëm gjeostrategjik.

Konflikti në Ukrainë ka rritur pamasë urgjencën e anëtarësimit të vendeve aspiruese për anëtarësim në NATO dhe Bashkimin Europian.

Këto veprime do të parandalonin ndikimin e palëve të treta në disa rajone të pambrojtura.

Ne, në Ballkanin Perëndimor, jemi të shqetësuar për ndërhyrjen e përfaqësuesve rusë, të cilët synojnë të minojnë demokracinë dhe stabilitetin tonë”, u shpreh Meta.