Një javë pas dorëheqjes së tij nga Partia Demokratike, Lulzim Basha duket se nuk ka humbur kohë dhe ka nisur takimet me bazën e anëtarësisë, që ka qenë në anën e tij në gjithë këto muaj të vështirë.

Nëse shumë mendonin se Basha do të merrte avionin dhe do të nisej për në Hollandë, pas dorëheqjes nga PD, ai ka zgjedhur që të qëndrojë, e madje nën zë flitet se është drejt nisjes së një partie të re politike, ku rreth vetes mund të marrë edhe disa prej deputetëve që PD me Berishën mund t’i rrijë ngushtë.

Gjatë ditës së djeshme në media u raportua se Basha ka marrë edhe zyra të reja, në afërsi të selisë së PD-së, në qendrën Torre Drin, ku pritet të koordinojë dhe aksionin e tij të radhës politik.

Pas dorëheqjes nga PD, ai nuk e mohoi kategorikisht rikandidimin, edhe pse prania në këtë garë e Berishës duket se e zbre ëndrrën për të vazhduar ‘betejën apo misionin e tij’, që një ditë të bëhet kryeministër i shqiptarëve.

Nga ana tjetër Komisioni i Rithemelimit është duke fituar gjithnjë e më shumë terren, ku selia tashmë nuk është më e blinduar, ndërkohë që ish-kryeministri Sali Berisha ka rinisur turin e tij të takimeve me demokratët në bazë.

Kandidimi i tij duket se e ‘vret’ garën për kryetar, sa kohë që takimete Foltores janë shndërruar dhe si fushatë për rikthimin e tij në krye të partisë pas afro 9 viteve.