Kreu i Partisë Demokratike-Demokratët Euroatlantikë, Lulzim Basha, në një intervistë për BBC-në gjatë radio debatit “World Questions” të moderuar nga Jonny Dymond, diskutoi në lidhje me krizën e shpresës dhe largimin masiv të të rinjve nga Shqipëria. Basha theksoi se vendi është përfshirë nga një krizë e thellë besimi dhe shprese, e cila buron nga dështimi i sistemit politik për të përmbushur nevojat e qytetarëve, veçanërisht të të rinjve.
Ai vuri theksin në tre probleme kryesore që janë shkaqet e kësaj situate: mungesa e mundësive, meritokracia e pamjaftueshme dhe pabarazia para ligjit. Sipas Bashës, këto mangësi kanë krijuar një situatë ku të rinjtë ndihen të përjashtuar nga procesi politik dhe të papërfaqësuar, duke i shtyrë ata të kërkojnë mundësi më të mira jashtë vendit.
Pjesë nga intervista:
Gazetari i BBC pyeti Bashën se si ai do të bindte një 20-vjeçar të mos largohej nga Shqipëria. Basha iu përgjigj duke kujtuar përvojën e tij personale:
“Isha 19 vjeç kur u largova për të studiuar në Holandë, dhe vendi im ishte në një gjendje depresioni më të rëndë se 15 vite më parë, megjithatë kishte kaq shumë shpresë dhe pritshmëri. Njerëzit shpresonin se ditë më të mira po vinin.”
Basha pranoi se Shqipëria ka bërë ndryshime të mëdha në 34 vitet e fundit, por sot përballet me një krizë të thellë të shpresës dhe besimit. Ai theksoi se sistemi politik është përqendruar në përfitime për një grup të vogël në pushtet, duke lënë mënjanë qytetarët dhe interesat e shoqërisë. Ai kritikoi gjithashtu vendimin e fundit të Partisë Socialiste dhe disa pjesëve të opozitës për të mbyllur listat zgjedhore, duke penguar të rinjtë të marrin pjesë si kandidatë në zgjedhje dhe të kontribuojnë në politikën e vendit.
Sipas Bashës, ky veprim është vetëm një nga shumë shembuj që tregojnë se si elita politike vepron në kundërshtim me interesat e shoqërisë, duke përfshirë të rinjtë që për këtë arsye largohen nga Shqipëria në kërkim të mundësive më të mira, meritokracisë dhe barazisë para ligjit.
