Lulzim Basha është shpallur zyrtarisht fitues i garës për kreun e ri të Partisë Demokratike. Komisioni i zgjedhjeve në PD ka publikuar rreth orës 14:30 rezultat zyrtare, ku Basha renditet i pari, pas tij vjen Agron Shehaj, Edi Harxhi dhe Fatbardh Kadilli.

Basha ka arritur që të sigurojë  32882 vota, duke u pasuar nga kandidati tjetër, Agron Shehaj me 6038 vota. Me pas u rendit Edit Harxhi, ndërsa Fatbardh Kadilli mori vetem 781 vota.

Jemin Gjana tha se janë adminstruar 76 kutitë e 76 komisioneve të votimit në gjithë vendin.

“Komisioni zgjedhor i PD sapo ka përmbyllur procesverbalin e përgatitjes dhe të deklarimit të rezultatit përfundimtar zyrtar. Kemi administruar 76 kutitë e 76 komisioneve të votimit në gjithë vendin, në prani të komisionit janë hapur një nga një kutitë, janë regjistruar të dhënat e dokumentuara në procesverbale. Nga procesverbalet e administruara në kuti rezulton që në të gjitha rastet, komisionerët natyrisht kanë firmosur dhe përfaqësuesit e kandidatëve në garë në të gjitha ato raste kur kandidatët kanë pasur atje përfaqësim”, deklaroi Jemin Gjana.

Bazuar në të dhënat zyrtare të procesverbaleve të futura në përllogaritje, rezulton se nga anëtarët e PD kanë votuar 41097 anëtarë, 413 vota të pavlefshme, 40684 vota të vlefshme, të ndara sipas kandidatëve në garë.

Për zotin Fatbardh Kadilli kanë votuar 781 anëtarë
Për zonjën Edit Harxhi kanë votuar 983 anëtarë
Për zotin Agron Shehaj 6038 anëtarë
Për zotin Lulzim Basha kanë votuar 32882 anëtarë

“Bazuar në këto të dhëna Komisioni zgjedhor i PD shpall zyrtarisht fitues të garës për kryetar të PD zotin Lulzim Basha”, deklaroi më tej Gjana.