Procesi i votimit për zgjedhjet e pjesshme vendore ka nisur me probleme në disa bashki të vendit ku dhe po mbahen. Qytetet si Dibra dhe Shkodra kanë raportuar për probleme teknike, mungesë të energjisë elektrike dhe për shkak të motit të keq.

Ndërkohë një situatë e tensionuar është krijuar dhe në qendrën 28891 në Savër të Lushnjës ku në listën fizike mungojnë 20 emra të votuesve. Gjithashtu mësohet se dhe shumë fletë votimi janë hedhur në kutinë për materialet zgjedhore. votimi është pezulluar, ndërsa qytetarët kanë pritur jashtë qendrës për të hedhur votën e tyre. Por komisionerët e kanë cilësuar mungesën e 20 votuesve si një gabim zgjedhor, ndërsa hedhjen e fletëvotimeve në kutinë e gabuar do të mbahet një procesverbal për të mos zhvlerësuar votën e qytetarëve. Në këtë qendër ka pasur dhe një përplasje me gazetarëve dhe kryetares së KZAZ-së e cila i ka kërkuar medias të dalë jashtë pasi po pengon punën.

“Nuk më keni marrë dhe nuk më keni thënë mua gjë, në KZAZ nuk është raportuar. Është i zgjidhur si problem. Votuesit janë duke e bërë. PEI vazhdon. Është mbajtur një procesverbal. Për kutinë, është mbajtur një procesverbal, nuk ka asnjë problem, e rëndësishme është që kodet janë të rregullta”, tha ajo për mediat.